Somaliland: Golaha Wasiirrada Oo Falanqeeyey Doorashooyinka Dalka Kusoo Foolka Leh.

0

Hargeisa(HNN):-Golaha Wasiirrada Somaliland, ayaa Shirkii Khamiista Maanta kaga hadlay Doorashooyinka Goleyaasha Wakiillada iyo deegaanka ee dalka ku soo foolka leh.

Shirka Golaha Wasiirrada oo uu Shir-guddoominayey Madaxweyne Muuse Biixi Cabdim ayaa war qoraal ah oo ka soo baxay waxa baaq loogu diray Golaha Guurtida Somaliland.

War qoraal ah oo Shirka ka dib, ka soo baxay Madaxtooyada oo soo gaadhay Wargeyska Geeska Afrika ayaa u qornaa sidan “Fadhigii 70aad ee golaha wasiirrada Jamhuuriyadda Somaliland oo uu shir guddoominayey Madaxweynaha Jamhuuriyadda Somaliland, Mudane Muuse Biixi Cabdi, kuna wehelinaayey Madaxweyne ku xigeenka Jamhuuriyadda Somaliland, Mudane Cabdiraxmaan Cabdilaahi Ismaaciil (Saylici), ayaa maanta lagu lafo-guray arrimaha doorashooyinka wakiillada iyo degaanka ee dalka ku soo fool leh.

Ugu horrayn waxa uu Golaha wasiirradu usoo jeediyey golaha guurtida inay is waafajiyaan waqtiga ay Komishanka doorashooyinka qaranku u cayimeen inay ku qaban karaan doorashooyinka wakiillada iyo deegaanka oo ah 31-05-2021 iyo go’aankooda.

Sidoo kale goluhu wuxuu saddexda xisbi qaran u soo jeediyey inay si wada-jir ah u fuliyaan shuruucda doorashooyinka, gaar ahaan shuruudaha murrashixiinta, murrashixiintuna ay dhinacooda soo gudbiyaan qoraallo muujinaya inay u hoggaansamayaan sharciga doorashooyinka. isagoo goluhu usoo jeediyey Komishanka doorashooyinka qaranka inay murrashixiinta ku ilaaliyaan shuruudaha xeerka doorashooyinku tilmaamay. Waxaanu Goluhu warbaahinta dalka usoo jeediyey inay bulshada usoo bandhigaan xeerka doorashooyinka gaar ahaan labada doorasho ee foodda inagu sooo haya.

Ugu danbayntiina Goluhu waxa uu laamaha Amniga ee dalka ku adkeeyey inay xoojiyaan Amniga qaranka, inta lagu jiro u diyaar-garowga doorashooyinka illaa maalinta la dhamaystirayo hawlaha doorashooyinka, siina laban-laabaan dedaalkii ay horeba ugu jireen. Guddi-hoosaadka siyaasadda ee golaha wasiirraduna hubiyaan fulinta qodobbadaas, dersaanna wixii caqabad ah ee ka iman kara, si loo xalliyo.

 ALLAA MAHAD LEH

Maxamuud Warsame Jaamac

Af-hayeenka Madaxweynaha JSL.